Australia Ah ‘Biaknak Ngei Lo’ An Karh; Khrihfa An Zor Chinchin Cang

Khrihfa

A hnubik 2016 ah tuahmi Australia ram pumpi milu relnak cazin nih Australia ram hi biaknak phunkip tlinnak ram pakhat a si ti a langhter, cun Australia ram minung 24.4 million chungah 52% cu Khrihfa an si rih hna tiah hmuh a si.

Biaknak dang lakah a tambik hi Islam (2.6%) le Buddhism (2.4%) an si i Australia minung milu thenthum-thenkhat deng (30%) hi biaknak ngei lo an si tiah hmuh a si.

Australia ram chung biaknak lei umtuning hi duhsah tein a liamcia kum 50 chungah aa thleng ngaingai cang.

1966 ahkhan Khrihfa hi 88% bak an rak si i 1991 ahkhan 74% ah a tla. 2016 ah cun  Khrihfa milu cu a zor chinchin than i 52% lawng ah aa chuah.

Australia ram chung biaknak lei ah a tambik hi Catholic khrihfa bu a si i Australia minung milu 24.4 million chungah 22.6% an si.

Australia ah biaknak phunkip a hung um cang i Hindu, Sikhism, Islam le Buddhism hna zong hung um cang hna. Hindu hi 2006 in 2016 karlak ah biatak tein a karhbik bak an si.

Australia ram chungah biaknak ngei lo hi a karh chin lengmang i a karh ning zong hi a rang ngaingai. Biaknak ngei lomi pawl hi 2006 khan 19% in 2016 ah 30% tluk in an karh. 2011 in 2016 karlak ah 22% in an karh i a milu in 2.2 million in biaknak ngei lo an karh.

Kum upa deuh pawl, kum 65 le a cunglei pawl hi Khrihfa deuh in an i chim i kum no deuh, kum 18-34 karlak pawl hi biaknak ngei lo in aa chimmi an tam, biaknak ngei in aa chimmi mino hi 12% an si i biaknak ngei lo in aa chimmi hi 39% an si.

Pengthen (State) in zoh ahcun New South Wales ahhin biaknak ngei in aa chimmi an tam bik i 66% an si, Tasmania ahhin an tlawmbik i 53% an si.

2011 lioah khan Catholic hi a tambik an rak si i 25.3% a rak si i a changtu (pahnihnak) ah biaknak ngei lo hi an si i 22.3% an rak si. Asinain, 2016 ah cun biaknak ngei lo hi a tambik ah an cang i 30.1% an si i Catholic hi 22.6% ah a tla.

Ref: ABS

error: Faiceu News COPY kan sianglo, SHARE lawng ngah!!