Australia Ah Cardinal Charles Bo A Phan, Myanmar Kong Chimphuannak A Ngei

Cardinal Charles Bo

Biatak tein minung covo kong a aupitu Myanmar Catholic lubik Cardinal Charles Bo cu Australia ram ah June 9 ah a phan i atu hi Sydney ah a caam liopi a si. Melbourne le Perth ah a rak tlawng chih lai tiah theih a si.

Cardinal Charles Bo cu Catholic Mission (Australia) nih biachim dingin an sawm i Australia ram chung hmun tampi ah zumhnak, daihnak, fimthiamcawnnak le zaukphung (democracy) lam ah aa tungmer liomi Myanmar ram kong pawl chimphuannak a ngei lai.

Catholic Mission hi amah Cardinal Charles Bo tanpinak in Southeast Asian ram chungah fimthiamnak lei thanchonak caah tuan a rel liomi riantuan phu pakhat a si.

Cardinal Charles Bo hi raltha ngai in Myanmar ram chung daihnak le rualremnak kong ah biatak tein tlangautu a si. Rakhine ramkulh le hmun dang i a cangmi minung covo buarnak kong ah faakpi in a cawlcang, cu lengah ramleng hna sualphawtnak kong zong ah Aung San Suu Kyi a dirpitu zong a si.

June 10, Zarhpini ahkhan Cardinal Charles Bo cu St. Mary’s Cathedral, Sydney ah mizapi he pumhnak a tuah i cu hnuah Sydney i Myanmar pawl sinah pumhnak le tonbiaruahnak a ngeih hna. Melbourne le Perth zong ah caan hmannak a ngei lai.

Thaizing 16 June ahkhin Nitlaklei Melbourne ah a phan lai i Myanmar Catholic community hna sinah caan a hmang lai. Sunglawi ngai in amah donnak le biaruahnak cu Immaculate Conception of Our Lady Catholic Church, Sunshine ah zinglei sml 11: 00- 3: 00 pm tiang tuah a si lai.

“Cardinal Charles Bo hi Myanmar ram daihnak le rualremnak caah biatak tein rian a tuanmi hruaitu tha taktak a si. Atu le atu hi ram le miphun kong ah a rethei i faakpi in thazaang a chuahmi a si. Australia ram ah amah bantuk kan don khawh hi kan caah hmuh a har ngaimi a si”.

“A liamcia caan chungah Rakhine ramkulh chung buaibainak kong cu thawngzamhnak ah a lang ngaingai. Hi bantuk caan ah biaknak lei hoih in Cardinal Charles Bo hi ram chung daihnak kong tlangautu bik pakhat a si. Hi a cawlcanghnak le a ruahnak hi mi vialte caah thahnem santlai a si hrimhrim lai”, tiah Catholic Mission National Director Father Brain Lucas nih a chim.

Myanmar ram chung daihnak caah biaknak lei upa/hruaitu hna cawlcanghnak a biapitnak kong zong Cardinal Charles Bo nih cun a chim. “Mi thong tampi hi sifahnak tangah an nung, mi thong tampi cu ral tampi lakah an vakvai i chan thar sal tangah an taang ko hna”, tiah Myanmar kong a rak chim.

Cardinal Charles Maung Bo cu 29 Oct, 1948 ah a rak chuak i hringtu a nulepa hna cu John le Juliana Aye Tin an si. Hringtu a pa hi Cardinal Charles Bo kum 2 a rak si lioah a rak thi i cu hnuah cun Salesian sianginn, Mandalay ah kuat a rak si.

1962 in 1976 tiang Pyin Oo Lwin, Anisakan i Selesian sianginn ah fimnak a rak cang i 09 April 1976 ah tlangbawi a rak cang. 1986 ah Lashio Diocese i bishop ah khanh a rak si i 1996 ah Pathein Diocese ah thial a rak si.

07 June 2003 ah Yangon Archdiocese i Archbishop ah khanh a rak si than i Vatican lei in thanhnak tuah hmasa a si hnu, 04 Febbruary 2015 ah Pope Francis nih Cardinal ah a khanh than.