Australia Ah Rev. Tluang Hre Le CNA Ralkap Mai Ca Bor An Phan Lai

CNA

CNF/A Camp ah pastor a tuanmi Rev. Tluang Hre le CNA Sergeant Mai Ca Bor cu Australia ram ah an phan lai, nihin hi Yangoon Ramleng Vanlawngtual in an rak i thawh cang tiah theih a si.

Pumpek bak in miphun dawt ruangah CNA ralkap a tuanmi nusaltha Mai Ca Bor le CNF/A Camp Victoria ah thlarau lei in pacan pastor a tuan liomi Rev. Tluang Hre cu tuzaan sml 10: 30 ah Australia, Perth ah an phan cang lai.

CNA Sergeant Mai Ca Bor hi a liamcia caan chungah USA, Denmark le ramleng dangdang in auh a rak si ko nain Visa a rak ngah kho bal lo. Atu tan Australia a phak hi ramleng ah a voikhatnak a phak a si lai.

Rev. Tluang Hre le Mai Ca Bor cu Australia ah thla 3 chung an caam lai, hi an caam chungah peng kip ah khualtlawnnak an ngei lai.

April 12 in 29 tiang Perth, April 30 in May 20 tiang Melbourne East, May 21 in June 10 tiang Melbourne West, June 11 in 17 tiang Brisbane, June 18 in 24 tiang Coffs Harbour le June 25 in July 8 tiang Adelaide ah an caam lai.

Australia an um chungah peng kip ah biachimnak le Chinmi mipi hna he tonbiaruahnak an ngei lai, cun Chin khrihfabu kip zong ah lenkainak ngeih dingin timhlamhnak a um fawn.

Rev. Tluang Hre le Mai Ca Bor hna Australia tlawnnak cu Chinland Club tawlrelnak in a si.

Kan miphun le ram caah pumpek taktak in rian a tuanmi hna hi kau piin innka onh hna u silaw, kan lungthin ah hmunhma pe cio hna u sih, cun kan si khawh tawk cio in kutza zamh khawh i zuam ko hna u sih tiah Faiceu Media Group in kan miphun vialte sin sawmnak kan langh chih.