Australia Rammi Sinak Phung Thlennak Kong Ah Mipeem Tampi Sivaang In An Um

Rammi Sinak

Australia cozah nih rammi sinak phung thlen a timhnak kong ah mipeem thong tampi cu sivaang ngai in an um rih ko hna.

Australia rammi si dingin a hngakhlangmi mipeem hna cu April 20 ahkhan ruah lo piin Cozah sinin rammi sinak phung thlennak ding thawngchia an rak dong.

Hi phung remh/thlennak ding cu thla zeimawzat buaipi a si cang i thlen/remh dingin Hluttaw Niam ah cohlan a si cang.

Hi phung thlennak cu sualnak ngei phungbuar pawl le ralhrang he pehtlaihnak a ngeimi pawl rammi sinak pek an si sual nakhnga lo ding caah timhmi a si. Cun, a phan thar mipeem hna hi tam deuh in ram chung mi hna he pehtlaihnak le riantuannak an ngeihnak dingah a si.

“Rammi sinak hi thatter deuh dingin phung thlennak hi kan thanhmi a si. Australia rammi sinak hi upat awk, sunhsak awk le lawmh awk a si”, tiah Prime Minister Malcolm Turnbull nih a chim.

Thlen dingin timhmi ning in cun zungzal um khawhnak (PR) a ngei cangmi hna hi rammi sinak sok hlanah kum 4 hngah ding, UK, US, Ireland, Canada le New Zealand mi hna ti lo poah cu har deuh in English (Miraang ca) phitnak ngeihter hna ding ti a si.

Cun, innchung tangah buaibainak (nupi le fale cung fahnak pek/kutthlaknak) a tuahmi an si le si lo, kum tlinglo ngakchia a thitummi an si le si lo ti bantukin pumpak ziaza kherhlainak tuah ding ti a si.

Hi phung thlennak hi kum 16 tang le kum 60 cung pawl le mi tlamtlinglo pawl caah cun a si lo.

Atu ahhin Hluttaw Sang lei in hi phung thlennak kong dothlatnak an tuah tikah kum 4 hngah hau lo in le Miraangca har tuk le sang tuk in tuah awk a si lo tiah ruahnak an chuah cang i upa lutlai tam ngai zong nih an doh.

“Hi phung hi thlen a herh, cun thlen a si hrimhrim ko lai. Thlen ding hrimhrim in kan chuahpimi a si. Kan ram ah rat dingin timhnak na ngeih ahcun Australia phung zulh dingin i tim ko”, tiah Immigration minister Peter Dutton nih a chim.

Hluttaw Sang ah Cozah nih hi rammi sinak phung thlennak kong an chuahpi rih lai, asinain atu tiang ahhin cun hi phung thlennak cu hlawhtlin lo dawh a si lo.

Ref: SBS

error: Faiceu News COPY kan sianglo, SHARE lawng ngah!!