Bawmh Halnak: Malaysia Ah Chinmi Tlangval Pakhat A Tlau

Chinmi Tlangval

KUALA LUMPUR: Malaysia ah ralzaam dirhmun in khua a sami  Chin tlangval Tha Pum cu a khuami hna nih an pehtlaih khawh lonak hi kum 1 deng a si cang i atu hi khawika hmun a um theih lo a si tiah Leikaang khuami Pu Bawi Cung sinin theih a si.
Tlangval Tha Pum cu Malaysia ah 24 May 2013 ah a rak phanmi a si i CRC Card aa tlaihmi a si. A CRC Card number cu 13-53963 a si.  Amah hi Laitlang, Thantlang peng, Leikaang khuami a si i Pu Lian Le, Pi Sung Tin an si.
Tlangval Tha Pum cu Seri Petaling ah Wire rian a tuanmi a si i a riantuannak hmun ah a riak in a um tawn mi a si tiah theih a si.
“Khuami nih a caancaan ahcun pehtlaihnak kan tuah khawh ko, a hnubik pehtlaihnak kan tuah khawh hi December/November 2017 hrawng ahkhan a si.”
“Kan pehtlaih khawh ti lonak hi a sau ngai cang ko, a boss pa kan chawnh tikah ka sinin rian a chuak cang, khawika ah a um le rian a tuan cu ka thei lo tiah a kan leh”, tiah Pu Bawi Cung nih Faiceu ah a chim.
Amah hi Malaysia ram ah unau a ngeimi zong a si lo, cun Laitlang lei zong ah nulepa a ngei ti lomi a si tiah theih a si. Amah a hmu i a umnak a theihhngal mi hna nih Pu Bawi Cung (01137655171) le CRC sinah thawngthanh dingin khuami hna nih nawlnak he bawmh an hal.