Chuncung Khua Chungah Zu Zuar Khap A Si; Ks. 2,000,000 Leng Man Tlaih A Si Cang

Chuncung

Hakha Peng, Chuncung khua chungah zu zuar khap a si i nihin tiangah zu Ks. 2,400,000 man hrawng cu tlaih a si cang tiah theih a si.

July 17 thawk khan Chuncung khuabawi hruainak in khuabawi le tlang upa chungtel hna nih khua chungah zu zuar tlaihnak cu an thawk i zu zuartu minung 4 sinin zu Kyats sing 24 man hrawng an tlaih.

An tlaihmi zu pung/thawl pawl cu July 22, zaanlei sml 2: 30 hrawngah Rualtlei timi khualeng i mawtaw lam thlang lungpang ah thlet, hlonh le khuai dih a si.

Tlaihmi zu hna cu OB le Rum deuh pawl an si, OB hi tam ngaite tlaih a si. Adang cu cozah sermi Rum ti bantuk pawl an si hna.

Chuncung khuabawi a tuahmi poah nihhin hi hlan zong ah Chuncung khua chung zu zuar hi khap lengmang a si rak si nain, nihin tiang hi zu zuar cu an um peng rih.

Hi kong he pehtlai in atu lio Chuncung khuabawi tuanmi Pu Lai Hit nih, meeting voi tamnaw tuah a si hnu le zapi hnatlaknak ngeih a si hnuah atu bantukin zu zuar khapnak le zu tlaihnak hi kan tuahmi a si tiah a chim.

“Hakha lei in an cawk in a dinmi cu kannih nih kan ti khawhmi le kan kham khawhmi a um lo. Asinain, khua chung bakah zalong tuk in zu zuar a si tikah kan fale mino tampi an rawk chin lai ti kan phan caah zu zuar kan khapmi hi a si”.

“Zu zuartu hna hi ralrinnak (warning) pek an si hnu, zuar ti lo dingin minsen thutnak tiang kan tuahter cang hna hnuah an zu zuarmi hi kan tlaih hna. Meeting biachahnak bangin Ks. 100,000 dan zong kan liamter hna”, tiah Pu Lai Hit nih a chim.

Atu tan ah tlaihmi zu hi a tangka in zeizat man a si cu theih a si lo nain, zu zuartu hna hmurkaa in Ks. Sing 24 man hrawng a si lai tiah theih a si.

Hi ka ahhin Zu thlet/hlonh lio video zoh khawh a si>>>>https://www.facebook.com/mai.asiang.1/videos/pcb.1771623599570820/814261352294930/?type=3&theater&ifg=1

https://www.facebook.com/mai.asiang.1/videos/pcb.1771623599570820/814271118960620/?type=3&theater&ifg=1

Ref: Chuncung Family Network (CFN)