Datsi In Amah Le Amah Khangh Aa Timmi Rohingya Pate Thongthlak A Tong

Myanmar

Naite i Kuala Lumpur chungah Rohingya pawl nih Myanmar Embassy hmai duhlonak an langh lioah kum 19, Rohingya tlangval note pakhat cu amah le amah thah a timh caah tazacuai a si.

Nihin ah biaceih zung ah chuahpi a simi Rohingya pate, Ali Johar Jamal Hussin cu biaceih zung chungah a tah bute in mah le mah thah timhnak sual ka tuah tiah chimphuannak a ngei.

Ali Johar cu rawldawr ah rian a tuanmi a si i August 30, zinglei sml 11: 30 ah Ampang Park LRT tlanglawng station ah duhlonak langh dingin timhtuahnak an ngeih lioah amah le amah datsi (petrol) aa toih i khangh aa timh caah thla 3 chung thongtlak dingin biakhiahpiak a si.

Cun, amah hi Malaysia ram chungah phungninglo in a luatmi a si caah Immigration phungbuarnak in thla 3 thongtlak chap dingin biaceihtu Ahmad Solihin nih dantatnak a pek rih.

Ali Johar nih cun a lung a dongh tuk ruangah le Myanmar ram chung buaibainak kongah duhlonak langhnak caah amah le amah meikhangh in thah aa timhnak hi a si tiah a chim.

Ka upa hi Bangladesh ah a zaam i kei hi Malaysia ah ka rak zaam ve mi a si tiah Ali Johar nih cun a chim.

Ali Johar nih amah le amah datsi aa toih lioah hin Dang Wangi palik pawl nih an fuh i mah le mah thahnak tuah lo ding cun an va chimh. Asinain, a au i ‘kan khua zong Myanmar ralkap nih an duah cang, nun chan ngei lo ka si. Ka thih ah a tha deuh’ tiah amah le amah khangh aa tim ti a si.

Cu hnuah palik nih cun an tlaih i biaceih zung ah phaknak le atu bantukin mah le mah thah timhnak sual in thongthlak a sinak hi a si.

Ref: The Star.NST

error: Faiceu News COPY kan sianglo, SHARE lawng ngah!!