I Dohnak Ngol Dingin RCSS Le Myanmar Ralkap Hnatlaknak An Ngei

Ralkap

Restoration Council of Shan State/Shan State Army-South (RCSS/SSA-S) le Myanmar Ralkap hna cu kap hnih karlakah i dohnak ngol cang dingin hnatlaknak an ngei cang tiah theih a si.

RCSS/SSA-S chairman Gen Yawd Serk hruaimi lamkal bu cu Cawn Nikhatni ahkhan Naypyitaw ah State Counsellor Daw Aung San Suu Kyi le Myanmar Ralkap bawizik changtu he tonbiaruahnak an ngei.

Hi tonbiaruahnak ah kap hnih ralkap karlak i hmuhthiamlonak remthat dingin le i theihthiamnak a thar in ser dingin ceihhmainak an ngei tiah RCSS/SSA-S in Lt-Col Sai Mein hmurka in theih a si.

“Kap hnih karlak i hmuhthiamlonak le dohnak ruangah rammi mipi an teemtuar, cucaah i dohnak hi kan hrial awk a si cang. Ram chungmi hna retheihter lo dingin kan cawlcang hna lai tiah hnatlaknak kan ngei”, tiah Lt-Col Sai Mein nih cun a chim.

RCSS/SSA-S hi Rampumpi Dahngolnak Hnatlaknak (NCA) minsen thu cangmi an si ko nain Myanmar ralkap he kap hnih karlakah tukdohnak a rak um lengmang. Tu kum March, April le July ahkhan kahdohnak a rak um.

July thla ahkhan Myanmar ralkap lei in ralchannak a rak um ruangah Chiang Mai ah tuah dingmi Committee for Shan State Unity (CSSU) meeting tuahmi leet than a rak si i cu hnu ahcun Myanmar Ralkap le RCSS/SSA karlak ah a thar in ralnak le dohnak a rak chuak.

CSSU hi Shan ramkhel party pawl, CSO pawl le hriamtlai phu RCSS/SSA-S le Shan State Progress Party/Shan State Army-North (SSPP/SSA-N) hna an i funtomnak bu a si.

Ref: The Irrawaddy

error: Faiceu News COPY kan sianglo, SHARE lawng ngah!!