Hakha Ah Vawlei Cimh A Zohtu Seh An Bunh: Vuanci Pau Lwin Min Thang Nih A Zoh

Chin ramkulh khualipi Hakha ah vawlei cimh a zohtu seh (Landslide Sensor) cu March 20, 21 ah an bunh tiah Faiceu nih thawng kan don.

CCERR (Community Care Emergency Response and Rehabilitation) le FHI 360 hruainak tangah Loughbrough University (UK) thiamsang nih an rak bunhpiak hna.

“Tutan kan bunhmi seh nih hin, vawlei a cimh ding le a cimh lo ding cu thawng (info./data) a lak lai i, vawlei a cimh ding a si sual ah cun ralrin peknak (alarm) a awn lai. Vawlei a cawlmi cu Sensor chung ummi transducer nih a tlaih. Cu a tlaihmi vialte cu Base station ah a hei kuat lai. Vawlei a cawlmi a fah deuh i, ralrin pektlak (threshold) a lonh asi ahcun, ralrin peknak aw (alarm) a rak thang lai” tiah Loughbrough University in thiamsang Niel nih a chim.

Seh (Sensor) cu Hakha keihsih Tit-taw dum chungah hmun khat, Hakha sianginn No. 1 (အထက ၁) thlang, Khaikam ah hmun khat tiin hmun hnih ah an bunh.

Volunteer pawl bawmhnak he an bunhmi seh pawl cu Zatlang Nun lei Vuanci (Social Welfare) Pau Lwin Min Thang nih tuzing (March 21) ah a rak zoh.

Mah seh kong he pehtlai in “Hi thil hi a herh bakmi asi. Zeica tiah vawlei cimh harnak cu kan rak ton cangmi asi. Hakha lawng hmanh si loin, Razua, Mitupi hei ti bantuk zongah bunh kan duh” tiah UK in a rami Niel sin ah a chim. Cun “Tu bantuk in thilri na kan bunhpiakmi zong hi kan i van tha” tiah a nolh chih.