Hakha-Thantlang Huatnak Bia A Chimnak Kongah CBC Pastor Rev. Arohn Kung Cungah WMLC Nih An Lungtlinlonak Ca An Tial

Hakha

Australia, Melbourne: Chin Baptist Church (CBC) i pastor Rev. Arohn Kung (Hrang Kung) nih naite i Melbourne khua chung mithi ruak humhnak hmun ah Hakha-Thantlang huatnak bia a chimmi kong ah Western Melbourne Lai Community (WMLC) nih an lungtlinlonak le an ngaihchiatnak ca an tial i CBC sinah an pek tiah theih a si.

Naite Australia Melbourne khua chung Chinmi ngaihthiamnak ton caan, mithi ruak humhnak hmun ah Rev. Arohn Kung nih cun projector kah bak in ruak hummi hna mi tampi sinah Hakha-Thantlang pawl thangchiatnak kong a chim ti a si.

“Zarhpi zaan, ruak hummi hi a thong in kan si, Mara, Senthang, Lautu, Hakha le Thantlang peng kan tling. Cu lioah cun, projector bak in timhtuahnak he ‘biatak hnarcheu’ timi tlangtar in Hakha le Thantlang, Lai holh hmangmi hna huatnak bia a chim” tiah CBC chungtel pakhat nih a chim.

“Malaysia i UN sok lio ahhin Hakha le Thantlang a si lomi poah cu Chin Refugee Committee (CRC) nih bia dik an rak chim duh hna lo. UN ah refugee nan sok ahcun nan nupi le he nan i tong kho ti lai lo tiah an rak thlen hna.”

“Zotung pa pakhat hna cu Lai holh a thiam lo ruangah CRC zung riantuan pakhat nih Laimi a si lo tiah UN riantuantu pawl sinah a rak leh hna caah mawtaw chungin thumh a rak tong”.

“Hakha le Thantlang pawl nih bia dik an rak chim lo ruangah Indiana polis ahkhin anmah lawngte an phan. Keimah nih UN zung ah chimrelnak ka ngeih hlanah cun Hakha le Thantlang a si lomi vialte cu UN ah an sung dih”.

“Keimah nih ka chim hnua lawngah UN zung ah holhlet dang pawl zong chiah an si. CRC nih bia dik a chim lo ruangah Australia rammi pa Andy le keimah nih Alliance of Chin Refugees (ACR) hi kan dirkamh i dirh a rak si”, tiah Pastor Rev. Arohn Kung nih a chim tiah CBC chungtel pakhat nih a chim.

Pastor Rev. Arohn Kung nihhin hi bantuk miphun tengnge theidannak kong a chimphuan hi voi khat lawng a si lo i CBC pumhnak caan zong ah a chim pah lengmang caah Hakha le Thantlang lei chungtel hna cu an ning zong a zak i an lung zong a nuam lo ngai tiah theih a si.

“Pathian riantuan pastor pakhat nih hi bantukin rualremnak kong chim loin huatnak le lungthin thencheunak kong a chimmi hi kan lung a nuam lo  ngai”, tiah CBC chungtel pakhat nih a chim.

Cun, “atu bantukin a thlarau bakmi pastor nih huatnak asiloah miphun thencheunak kong a chimmi hi kan lung a nuam hrim lo. Amah kan doh le kan huat si loin hi bantuk lungput le biachim  hi a karh nakhnga lo ding caah kan lungtlinlonak kan langhter hi a si”, tiah WMLC chungtel upa pakhat nih a chim.

WMLC nih an lungtlinlonak le an ngaihchiatnak ca an tialmi cu an tanglei bantukin a si.

Ca pekmi

CBC hi Melbourne Chin Church (MCC) in 2009 ah a rak chuakmi an si i atu ah chungtel 300 hrawng an si. Hi chungah zatuak in chungtel hi Hakha le Thantlanglei mi 45% hrawng an si tiah theih a si.

error: Faiceu News COPY kan sianglo, SHARE lawng ngah!!