Happy Birthday! Myanmar Vice President Henry Van Thio

Henry Van Thio

Nihin hi Myanmar Vice- President Henry Van Thio i kum 60 a tlinnak chuahcam tuak a si bantukin a caah thlacampiak philh hna hlah u sih. Pathian nih nun khuasaunak pe sehlaw, miphun le ram caah a zungzal in thluachuahnak pe ko seh tiah thlaza kan cam!

Faiceu nih Vice President Henry Thio i a tuanbia tawite rak khomhsuatmi hi atu ah kan rak langhter than.

Pu Henry Van Thio Konglam Tawi

Kawlram Vice President Pu Henry Van Thio cu Pu Lian Tlung le Pi Ngun Par hna i an fapa a si i 09 August 1958 ah Thantlang Peng, Tikir khua ah a rak chuak. A ngakchiat lioah Tikir Middle School ah taang 7 tiang a rak kai.

Cun, Hakha BEHS No. 1 ah taang 10 a rak awng i Mandalay University in BA (Geography) a rak dih hnuah Rangoon Arts and Science University ah Law (Upadi) in degree a rak la. Phillipine ah M.A (Part 1) zong a rak dih fawn.

Pu Van Thio innchung nu cu Dr. Sui Hluan (Rev. Dr. J. Ral Buai fanu) a si i fa 3 an ngei. An fale hna cu Salai JC Van Bawi, Mai Jennifer Ngun Sui Par, Salai Joseph Van Thio hna an si i an chungkhar cu Yangon ah khua a sami an si.

Pu Van Thio cu ralzkap zong a rak tuan balmi a si i Major rank tiang a rak phan. Khah-Lah-Yah 46 Putao, KLY 40 Ho Pyin, KLY 223 Moe Myit, Khah-Tah-Yah-Pha Ann, KTY-Mawlamyaing, KMY 503 Thi Paw hna ah ralkap a rak tuan tawn.

Cu lawng si loin ralkap in aa dinh hnuah Civil Service leiah a rak tuan than i Ministry of Industry ah Deputy General Manager a rak tuan.

November, 2015 Rampumpi thimnak ah Thantlang Peng NLD aiawh in Amyotha Hluttaw MP (House of Nationalities) caah thimnak a rak tling. March 10, 2016 ah Pu Henry Van Thio cu Amyotha Hluttaw (Upper House) ah NLD nih Vice President caah mintarnak an vun tuah i 11 March 2016 ah Amyotha Hluttaw ah Vice President caah thim a si than.

March 15, 2016 President thimnak ah Pu Henry Van Thio cu Vice President-2 sinak a co i March 30, 2016 ah biakamnak he Myanmar Vice President 2 ah fehter a si.