Kalay-Hakha AC Kat-taya Lam Phahnak ah CSOs Nih Hnor Suanmi An Zohfel Lai

World Bank nih bawmhnak a pekmi Kalay-Hakha AC Kat-taya phahnak ah, pawngkam hnorsuannak a tlawm bik khawhnak dingah tiin, pawngkam hnorsuannak (Social and Environmental Impact) pawl cu CSOs pawl nih tuanvo lak in an zohfel lai tiah theih asi.

World Bank nih $60 million dih in remh an timhmi lam timhtuahnak (project) pi nih, lamkam dum hau, inn le lo pawl a hnorsuan ding pawl kha ning cang tein a um khawhnak dingah tu bantuk in an tuah hi asi.

Mah Social and Environment Impact a tawlrel tu dingin Falam hrambunh CSOs, Hakha, Tedim, Matupi le Thantlang in CSOs pawl an si lai.

Nizan March 20 ah khan, Khuapi Pa nga in CSOs ai-awhtu pawl le, World Bank lei in tuanvo ngeitu pawl cu CACC hall ah tonnak an ngei i, tu bantuk in hnorsuanmi zohfelnak tuahnak nawl cu World Bank lei nih CSO pawl halmi bantuk tein nawl an awnh hna tiah theih asi.

World Bank nih bawmhnak a pekmi cu a rak lakthan ko nain, CSOs pawl nih VP Henry Van Thio an rak chimh tikah, World Bank sin ah VP Henry Van Thio le cozah tuanvo ngeitu hna nih an va len hna hnu in, bawmhnak cu pekthan asi.