Malaysia Ah A Tlau Ti’n Rak Ruahmi Tha Pum Cu Hmuh A Si Than Cang

Chinmi Tlangval

Malaysia ah ralzaam dirhmun in khua a sami  Chin tlangval Tha Pum cu khawika a umnak hngalh loin caan sau ngai a si hnuah dam le lawm tein a thawngpang theih khawh a si than cang tiah theih a si.

Tlangval Tha Pum cu Malaysia ah 24 May 2013 ah a rak phanmi a si i CRC Card tlaih in Seri Petaling ah Wire rian a rak tuan i a riantuannak hmun ah cun a riak in a rak um tawn.

Malaysia um a khuami, Leikaang khuami hna nih hin kum 1 deng bak an rak pehtlaih khawh lo caah lungrethei ngai in an rak kawl i 22 July ahkhan Faiceu thawngzamhnak zong in  Chinmi hna sinah bawmh halnak an rak tuah.

Atu ah cun Tha Pum cu Kalaymyo i a upa sinah dam le lawm tein a phan cang tiah thawng kan theih khawh cang tiah Malaysia um Leikaang khuami Pu Bawi Cung nih Faiceu sinah a chim.

“Nizaan ahkhan Kalaymyo ah dam le lawm tein a upa sinah a phan cang ti kan theih. Khuami nih kan rak pehtlaih khawh lonak a ruang kha thong a rak tlak ruangah a rak si.”

“Thong in Myanmar ah tlunter a rak si i atu cu dam le lawm tein a upa sinah a phan cang ti kan theih khawh cang cun kan i lawm taktak. Kan hna a ngam”, tiah Pu Bawi Cung nih cun a chim.