Malaysia Ah Buddhist Chungkhar Dong Khat Khrihfa Ah An Lut

Khrihfa

Malaysia ah ralzaam dirhmun in khua a sa ve mi Rakhine lei in Buddhist chungkhar dong 1 cu Buddha biaknak chuahtaak in Khrihfa biaknak ah an lut tiah theih a si.

July 22, Zarhpini ahkhan ah Buddhist a simi U Myo Win innchungkhar cu an umnak Manjung, Setiawan i Lautu Christian Fellowship biakinn ah Buddha in Khrihfa sinak an hmu tiah Christian Talin (FB min) sinin theih a si.

U Myo Win le a chungkhar cu 2003 ah Malaysia an phan i 2009 ah UNHCR Card an rak hmu. Amah hi fanu 2 a ngei i Tiling (Cuaipia phah rian) tuan in chungkhar paw a cawmmi a si.

Atu bantukin Khrihfa a cannak a ruang cu an fale ruangah hin a si ti a si. An fanu le pahnih, Gyi Gyi le Alisan timi unau 2 hna hi Khrihfa an hawile nih Sunday School an kaipi lengmang hna. Cu hnuah, hringtu an nu zong cu biakinn ah a fale nih an hruai pah lengmang ve ti a si.

Cuticun, an nulepa hna zong Khrihfa zumhnak ah an lung a hung um i atu bantukin an fanu le lam hmuhsaknak in Khrihfa biaknak ah lungtho tein an chungkhar tling in an luhnak hi a si.

U Myo Win hna chungkhar cu 22 July, Zarhpini ahkhan Lautu Christian Fellowship pastor Mang Vung Lian nih donnak le thlacampiaknak a ngeihpiak hna. Hi chungkhar hi ramthumnak, U.S. leiah a lan ding hruak zong an si cang tiah theih a si.