Malaysia UNHCR Zung Hmaiah Chin Ralzaam Hna Nih Duhlonak An Langh

Chin

KUALA LUMPUR: Nihin Cawn Ningani, June 29 ah Chin ralzaam hna cu kum 2020 in cun an khua ram ah tlun/kirter an si cang lai tiah UNHCR lei in chimh an sinak cungah UNHCR zung hmaiah duhlonak an langhter.

Nihin ah duhlonak langhnak ah aa telmi hi Chin ralzaam minung 500 hrawng cu an si lai tiah ruahdamh a si. June 13 ahkhan Malaysia hrambunh UNHCR nih Chin ralzaam hna cohlannak cu dihdonghter a si cang lai, tu thla August cun ralzaam an sinak laakpiak than hramthawk dingin biathleh a si cang tiah Chin ralzaam hna cu an rak thanh hna.

Malaysia ah a pahnihnak a tambik ralzaam hi Chin an si. Nihin duhlonak langhter cu Alliance of Chin Refugees (ACR), Chin Refugee Committee (CRC), Falam Refugee Organization (FRO) le adangdang ralzaam zatlangbu hna tawlrelnak in tuah a si.

Nihin i UNHCR zung hmai tuahmi duhlonak langhnak cu minutes 30 tluk hrawng a rau i hi caan ah sianginn thilthuam he ngakchia tampi zong an i tel hna.

Duhlonak langh hnu tlawmpal ah Chin ralzaam hruaitu 5 cu UNHCR zung hmun chungah luhter an si i UNHCR zung riantuan hna he sml 2 chung tonbiaruahnak an ngei.

 “Kanmah hi ralzaam kan si, mipeem hlawhfa kan si lo. Nihin ah duhlonak kan langhnak hi hmai zarh ah Geneva ah ralzaam kong ceihhmainak (Global Summit of Refugees) a um caah kan kong hi an ruah chih ding kan duh ruangah tuahmi a si”, tiah ACR coordinator James Bawi Thang Bik nih a chim.

UNHCR nih thanhca an chuah ning ahcun, “Chin ramkulh chungah ramkhel le zatlang nuncannak lei in siseh, humhimnak lei in siseh thanchonak a um cang ko, cun Chin ralzaam hna hi Myanmar cozah runvennak tangah him tein an i dor khawh cang ko caah UNHCR kilvennak an herh ti lo tiah UNHCR nih kan ruah cang”, ti a si.

August thla thawk cun UN zung ah a kalmi Chin ralzaam hna cu Interview zong tuah hau loin Dec 2019 tiang lawng an UN Card a ni caan khiah in pek an si cang lai, asinain Jan 1, 2020 in cun ralzaam an sinak a dih bak ve lai i an card zong zohpiak zong an si ti lai lo.

UNHCR lei nih cun kilven le zohkhenh a herh taktak mi nih cun interview tuah an si dingah rak hal hna ko seh tiah an chim. Atu ah UNHCR nih Chin ralzaam kong ah biathlehnak an ngeihmi hi Malaysia um ca lawng ah si loin Thailand le India um pawl ca zong ah a si chih.

 “Kan ram, Myanmar ah kan tlung kho rih lo, a ruang cu kan zumhnak le kan biaknak kong ah zalonnak a um rih lo.”

“Thla 18 chung kan hmailei khuasaknak kong ah khuakhan le lairel kan herh cang. A liamcia kum 20 lio he cun thil tampi a thleng cang ko ta, asinain a taktak ahcun thil tampi thlen le remh a hau rih”, tiah Alex Thanga nih a chim.

Tu kum May tiangah Malaysia UNHCR nih mincazin a laakmi ralzaam (refugee) le dornak kawltu (asylum seeker) hi minung 157,580 an si i hi chungah Chinmi hi 31, 150 an si.

Malaysia ram ah Chin ralzaam an umnak hi kum 20 leng a si cang i Chinmi tamdeuh cu Khrihfa an si i hremnak an tuar ruangah an ram in a zaammi hna an si.

Malaysia hi 1951 Refugee Convention ah ralzaam cohlannak kongah hnatlaknak minsen a thumi an si lo. Cucaah, ralzaam vialte hna cu Malaysian Immigration Phung tangah phungninglo mipeem ah ruah dih an si i tlaihkhih, hren/thongthlak le an chuahkehnak ram ah kuat khawh an si.

Nihin Chin ralzaam hna nih duhlonak an langhter kong ah Malaysia Thawngzamhbu The Star nih UNHCR sinah bialehnak zong an hal hna cang.

Ref: The Star