Miraang Holh Thiam Lo Ruangah Australia In Chungkhar Dongkhat Thawl An Tong

Chungkhar

Australia ram, Melbourne khuapi chungah kum 10 chung khua a sa cangmi chungkhar dongkhat cu Australia in an ram ah thawl tong dirhmun in an um tiah theih a si.

Hringtu pa, Dhiraj Sookharee cu zungzal um khawhnak nawl (PR) hmuhnak ding caah English test (Miraangca phitnak) ah mark zatawk a hmu lo i a sung ti a si.

Sookharee hi a chungkhar he a liamcia kum 10 lio ah Mauritius in Australia ah a rak peemmi a si i atu hi Pakenham ah rian a tuan liomi a si. A rianngeitu Daniel McCasker nih cun, “Sookharee hi miding, mifel le rinhchan awktlak”, a si tiah a chim.

Miraang holh thiam lo ruangah a ram ah thawl a tongmi Sookharee hi rian hmun ahcun zeihmanh Miraang holh in i chawnhbiaknak ah chamhbaunak a ngei lo, rian cawngmi mino hna zong hi amah nih rian a chimh hna ti a si.

“Sookharee hi Australia in a chuah ahcun ka lungnuam lo taktak lai. Ka theihhngalhnak hi kum 8 a si cang. Aho poah he rian an tuanti kho. Rian cawng liomi hna zong amah nih rian a chimh hna. Amah hi rian cawng tharmi hna nih an zohcho ngaimi a si”, tiah Daniel nih cun a chim.

 “An mei man le an ti man zong an pek peng ko, ngunkhuai zong an pek peng ko. Mi thate an si. Thil dik le thil tha a tuahmi an si”, tiah Daniel nih cun a chim chih.

Rian a tuanti hawi vialte le midang tampi nih hi hna chungkhar hna cu an ram ah tlunter an si lo dingah duhlonak zong an langhter len cang.

Asinain, atu ah hringtu pa Sookharee nih Miraangca phitnak a sungh ruangah a chungkhar zong harnak an tong chih cang.

Sianginn a kai liomi a fanu pathum le a nupi zong Australia ram in hringtu pa he an ram ah an kir than cang lai.

Hringtu pa Sookharee nih cun cozah sinah a chungkhar hna cu Australia umter hna dingin nawlnak a tuah len.

A fanu upa bik hi Killester College ah Year 12 a kai liomi a si. Killster College sianguk changtu nih cun an fanule pathum hna hi mipi le pawngkam caah a thahnem tukmi an si cang. Atu ah Australia ram in an chuah tikah an fimcawnnak leiah zaangdernak tampi a um te lai tiah a chim.

Sookharee i nupi, Annick nih cun an fanule hna hi Australia ram ah a thangmi le a tlonglengmi an si cang tikah ram dang i um than ding cu an i harh tuk lai tiah a chim.

Sookharee nih cun Immigration minister sinah nawlnak a tuah nain al a si cang i tu kum October ah Australia in an ram ah kir than ding an si cang.

Asinain, Immigration minister bawmtu Alex Hawke nih an konglam cu a zoh than lio a si i a herhmi catlap cahnah zong an apter than.

A herhmi catlap cahnah vialte zong ap dih than a si cang i visa zong a ngah than lai i ni khatkhat ah cun Australia rammi a cang kho than lai tiah ruahchannak kan ngei ko tiah Sookharee i a rianngeitu Daniel nih cun a chim.

Ref:SBS

error: Faiceu News COPY kan sianglo, SHARE lawng ngah!!