Myanmar President U Htin Kyaw A Rian In Aa Din

Myanmar

MYANMAR: Nihin zinglei ahkhan Myanmar President U Htin Kyaw cu a rian in dinh a duh cang caah a dirhmun cu a chuahtaak cang tiah theih a si.

State Counsellor Aung San Suu Kyi hruaimi Committee nih President thar thimnak cu na tuah lai than lai tiah NLD lei in chimrel khotu Monywa Aung Shin nih a chim.

 “Zei bantukin dah President kan thim lai ti cu kan i ceihhmai than lai. Aung San Suu Kyi hruaimi committee (phu) nih President thar thimnak kong ceihhmainak cu an tuah lai ka zumh. NLD party nih direct in thanhnak a chuah lai lo. Hi kong hi cu cozah le parliament deuh nih an tawlrel ko lai”, tiah Monywa Aung Shin nih a chim.

Phunghrampi Dal 73 (b) ning in cun ni 7 chungah President thar hi thim ding ti a si tiah President Zung in cathanh tawite an chuahmi ah an tial.

Cun, Phunghrampi ning in cun Vice President 1 Myint Swe hi ni 7 chung cu Acting President a tuan chung ding a si.

Phunghrampi Dal 73 (a) ah ‘Vice President pahnih chungah President thimnak ah thimfung tambik, a pahnihnak a hmutu nih, rian in ngol/dinh, thihloh le adangdang ruangah zungzal chamhbaunak/tlamtlinlonak a um i President rian/dirhmun a lawn ahcun, Acting President tuan ding’ tiah a um.

Phunghrampi Dal 73 (b) ah ‘Union Parliament nih ceihhmainak an ngeih chungah President rian a lawn ahcun Acting President nih ni 7 chungah President thar thim dingin Union Parliament Lutlai sinah thawng a thanh zawkzawk lai’ ti a si.

Atu bantukin U Htin Kyaw aa dinhnak a ruang cu tling le fiang in President Zung nih an langhter lo nain, ‘a ngandam lo ruang bik ahhin aa dinhnak a si ko tiah NLD lei chimrel khotu Monywa Aung Shin nih a chim.

Kum 2 chung cu President dirhmun in rian a tuan ko nain U Htin Kyaw a riantuannak hi a lang kho lem lo, Aung San Suu Kyi i a mi hmanmi menmen khi a si ko.

Kan hnu kum te khan, mipi nih cun cheukhat ni/caan sunglawi hmannak ah a baunak ruangah le a derthawmnak mithmai ruangah kum 71, U Htin Kyaw a ngandam lonak cu an rak theih ngai cang. Cun, ramleng zong ah aa thlop len cang.

Ref: Mizzima, The Irrawaddy