Nitlak Lei Melbourne Ah Rev. Tluang Hre Le CNA Ralkap Mai Ca Bor An Phan Cang

CNA

Camp Victoria ah Thlarau lei dirkamhtu dirhmun in rian a tuantu Rev. Tluang Hre le Chin National Army (CNA) Ralkap Mai Ca Bor cu April 12 ahkhan Australia ah an rak phan i Perth le Nichuahlei Melbourne ah zarh 3 veve an caam hnuah Nitlaklei Melbourne ah an phan cang i Khrihfabu kip sinah caan an hman liopi a si.

May 21 ah Nitlaklei Melbourne ah an rak phan i June 10 tiang an um lai, cu hnuah June 11 in 17 tiang Brisbane, June 18 in 24 tiang Coffs Harbour le June 25 in July 8 tiang Adelaide ah an tlawng than lai.

Atu lio hi Nitlaklei Melbourne um Khrihfabu kip sinah thawngtha chimnak le lung siaherh bia an chimphuan liopi a si i an caam chung zarh 3 chung poah cu Chin khrihfabu kip sinah lenkainak an ngei lai.

Mizapi he tonbiaruahnak cu kan hnu zarh Zarhteni ahkhan tuah dingin timhlamh a rak sic ang ko nain khuacaan ziak lo ruangah Mai Ca Bor cu a dam lo caah hmai zarh Zarhteni ahkhin tuah dingin a ni thawn a si.

Mizapi he tonbiaruahnak ngeihnak ding hmun cu a ruah hlanah tawlreltu Chinland Club nih an rak thanh hruak lai. A ni cu June 02, Zarhteni ah a si lai i zinglei sml 11: 00 in zaanlei sml 01: 30 tiang a si te lai.

Atu tiang an umkalnak ah CNA Ralkap Mai Ca Bor i a lungum chimphuannak nih minung tampi thinlung cu a kekkuai i mitthli tiang an luanter.

Australia an caam chungah Mai Ca Bor cu Australia hmun then, Chin Cable Network (CCN) nih tonbiaruahnak an ngeih. Cu lioah, Mai Ca Bor nih biahalnak a lehmi bia cu “Ka khua cu Camp Victoria a si, ka holh zong CNA holh a si ko”, ti hi a si.

Hi bialehnak a chimmi cungah mitampi nih cun Mai Ca Bor cu an conglawmh i upatnak an langhter. Mi lungfim cheukhat nih ‘upat awktlak nusal tha’ hrimhrim a si tiin an thangthat. Cheukhat cu laklawh le lungawthawm ngai in an um ve.

A taang rihmi zarh 2 chungah Rev. Tluang Hre le CNA Ralkap Mai Ca Bor cu Nitlaklei Melbourne um Chinmi hna sinah biachimnak le tonbiaruahnak an ngei lai.

[Hmaizarh Zarhteni ah tuah dingmi mizapi he tonbiaruahnak zong ah miphun khat Chinmi vialte hna nih chuah khawh i zuam hna u sih. Pumpek taktak in ram le miphun caah rian a tuantu Rev. Tluang Hre le kan Ralkap Mai Ca Bor hi upatnak he thinlung innka onh in upatnak pe cio hna u sih tiin Faiceu Media in kan in sawm hna.]