North Korea Nih Australia Ralrin A Pek Than

Australia

North Korea nih Australia cu US le South Korea he hmunkhat ah ralkap raltuk cawnnak (training) ah aa tel ve ruangah ‘mah le mah thahnak’ a tuah a si tiah ralrin peknak a tuah tiah theih a si.

US le South Korea ralkap thong tampi cu kum tinte in tuah tawnmi ralkap lei cawlcanghnak, raltuknak cawn an thawk cang i hi cawnnak ah Australia zong aa tel ve lai.

A liamcia ni 2 lioah khan North Korea cozah thawngzamh bu nih a chimmi cu ‘Australia nihhin nuclear ral dohnak kongah US leiah tang loin amah a ram daihnak hmuhter awkah luhlinhnak a ngeih deuh awk a si’ ti hi a si.

North Korea cozah thawngzamh bu nih a langhter ning ahcun Australia nih atu a thli tuahmi hi amah le amah thahnak aa kawl bantuk a si, thil sining taktak theih loin harnak/fahnak aa kawl bak a si tiah an langhter.

“Australia nih Korea Ral siseh, Vietnam Ral siseh, cun ralhrang raltuknak ah US a rak zulh, asinain, lehrulhnak ah a rak hmuhmi cu pehtlaihnak le nunnak tampi sunghnak lawng a rak si”.

“Australia bantukin US hnu zulh in North Korea, ralkap dohnak ah aa telmi ram hna cu North Korea ralkap cozah sinin lehrulhnak cu an hrial kho bal lai lo”, tiah thawngzamh bu nih an tial.

Australia Ralkap Bawizik Angus Campbell nih cun kan hnu zarh ahkhan hi raltuk cawnnak ah aa telmi Australia ralkap hna caah zeihmanh tih ding le poipang a um lai lo tiah a rak chim.

Hi raltuk cawnnak (Ulchi-Freedom Guardian) cu August 21 in 31 tiang tuah ding a si i lei tang lei, rili cung le van cung lei US le South Korea ralkap thong tampi cawnnak an ngei lai.

Hi cawlcanghnak ahhin ralkap 40,000 hrawng an i tel lai, cun mipi runvennak caah cawnpiak a simi South Korea cozah lei riantuantu pawl zong an i tel lai tiah US Runvennak Zung in theih a si.

Australia Prime Minister Malcolm Turnbull nih cun kan hnu zarh ahkhan North Korea nih ral a ser ahcun US leiah Australia zong kan tang ve lai tiah fiang tein a rak chim cang.

Ref: ABC

error: Faiceu News COPY kan sianglo, SHARE lawng ngah!!