North Korea Nih US A Kah Ahcun Australia Kan Tang Ve Lai: PM

Australia

Cawn Nili zaan ahkhan US Vice President Mike Pence le Australia Prime Minister Malcolm Turnbull cu biaruahnak an ngei tiah theih a si.

“Australia asiloah US cungah dohnak a um ahcun khat le khat kan i bawm lai tiah kan ram hnih karlak ah ANZUS hnatlaknak kan ngei. I runvennak ah cun kan tangti lai”, tiah PM Turnbull nih 3AW radio sinah a chim.

Cun, PM hlun Tony Abbott nih Australia caah missile ral in i runvennak hma laak kan herh tiah a chimmi kong ah Turnbull nih cun atu hi Australia nih a dirhmun aa zoh lio a si tiah a chim.

Ram Runvennak Zung in ruahnak an chuahmi US-style ‘Terminal High Altitude Area Defence’ (THAAD) system bunh hi a thahnem lo. Zeicahtiah THAAD hi hmunhma bite lawng caah lam nai deuh in kahmi missile khamnak caah tuahmi a si tiah Turnbull nih a chim.

President Trump nih a hraang taktak mi ‘meiziik le mei-alh” he den aa huah tiah a hrocer ko nain Mike Pence nih cun US nih North Korea kong ah chawlehnak lei phihkhamnak in lam a hmuhmi a um ko tiah Turnbull cu a chimh.

“Lam dangdang in kan mersan khawh ahcun a tha tuk ta, asinain North Korea nih US a kah bak ahcun a theipar cu faak taktak in a in ve hrimhrim lai”, tiah Turnbull nih a chim.

Labor party hruaitu Bill Shorten nih cun North Korea ral sernak hi a daih khawh nakhnga ram vialte nih i zuam ah a tha ko. North Korea ralkap cozah a thil tuahnak hi a poi taktak ko tiah a chim.

Cun, Bill Shorten nih cun North Korea hruaitu Kim Jong-un nih aa hruhpimi nuclear le missile hrocernak kong hi atu lio cozah siseh, opposition nih siseh kan i lungretheihpi bak ko tiah a chim.

“North Korea kong le kan ram humhimnak kong ahcun Labor le Liberal party kan pahnih in hmunkhat ah rian kan tuanti ko ti hi Australia rammi vialte nih theih ko hna seh”, tiah Opposition hruaitu Bill Shorten nih a chim.

Ref: SBS

error: Faiceu News COPY kan sianglo, SHARE lawng ngah!!