PNG Manus Tikulh Um Ralzaam Pawl Cu Hramhram In Thawl An Si Cang

Ralzaam

Australia nih Papua New Guinea (PNG) ah a ngeihmi Manus Tikulh thong/centre um ralzaam hna cu an umnak hmunpi in chuah cang dingin chimh an si cang, an i thial duh lo ahcun hramhram in palik nih dawithawl an si cang lai tiah theih a si.

Manus Tikulh i a ummi ralzaam hna cu PNG chung ralzaam pawl umnak hmun Foxtrot in hmun dangah i thial dih cang dingin nizaan ahkhan chimh an si cang.

Manus Tikulh ralzaam pawl hrennak tawlreltu nih ralzaam pawl sinah cun hmun dang ah i thial cang dingin le an i thial duh lo ahcun a hnuah dawithawl thiamthiam ding an si cang lai tiah thanhnak ca a chuah cang.

“July 26, 2017 thawk in Manus Tikulh ralzaam hrennak hmunpi cu khar a si cang lai caah PNG cozah nih an timhtuahmi hmun ah nan i thial a herh cang”.

 “PNG cozah nih ralzaam hna a simi hna caah East Lorengau Transit Centre (ELTC) ah umnak hmun an i timhtuahpiakmi hna hmun ah i thial dih ding a si lai”.

 “Asilole, ELTC ah thial nan duh lo a si ahcun Manus Tikulh centre chung Delta le Oscar chungah chikkhat um khawh nan si lai. Asinain, a hnu ahcun Manus Tikulh centre (MRPC) hi khar a si thiamthiam lai caah ELTC ah an i thial a hau thiamthiam te lai”, tiah thanhnak ca an chuah.

Cun, thanhnak ca ah aa tel chihmi cu, Manus tikulh i Foxtrot hmun ah a um peng rihmi ralzaam hna cu phungbuarmi an si tiin palik sinah ap khawh an si tiah ralrin peknak aa tel chih.

Cu lengah, Manus tikulh i Foxtrot hmun cu mei, ti le thianhhlimhnak vialte cu phih dih a si cang lai tiah an tial chih.

Hi hmun ah a ummi ralzaam tampi cu PNG cozah nih an timhpiakmi hna hmun hi an caah a him lo tiah an ruah caah le a zatawk in eidin le ngandamnak zohkhenhnak zong an pe lo ti a si caah an i thial duh lo.

Manus Tikulh centre ah a ummi ralzaam 600 hrawng nih Australia cozah sinah July 24 ahkhan hmun dang deuh ah hmunhma timhtuahpiak an si nakhnga nawlnak ca an tial.

An cakuat chungah cun “PNG i kan ca umnak timhtuahmi hmun ahhin atu le atu harnak kan ton tikah kan caah himnak a um lo. Ni tinte tukvelh kan tong, thil chuh kan tong, neek le sersat kan tong”, tiah an tial.

PNG chungah ralzaam pawl caah an timhtuahpiakmi hna umnak hmun hi Manus tikulh an umnak hmun nakin a bi deuh i minung 300 tang lawng a tlummi hmun a si.

Hi ralzaam hna hi US lei kal dingin aa hngakmi an sin ain October thla hlanah cun a kal kho ding an si lo. Zeicahtiah, July thla hlan deuh ahkhan US nih ralzaam a laak ding milu an tling cang.

Cun, a um rihmi cu hi ralzaam vialte hi an zapi tein US nih cohlan dawh an si lo tikah tam ngai cu PNG ahhin an taang kho rih. Australia le PNG cozah hna nih cun Manus tikulh centre cu October thla dih khar dingin bia an fehter cang fawn.

Ref: ABC

error: Faiceu News COPY kan sianglo, SHARE lawng ngah!!