Rev. Tluang Hre Le CNA Ralkap Mai Ca Bor Cu Mizapi He Tonbiaruahnak An Ngei Lai

CNA

Camp Victoria ah Thlarau lei pacan dirhmun in rian a tuantu Rev. Tluang Hre le Chin National Army (CNA) Ralkap Mai Ca Bor cu April 12 ahkhan Australia ah an rak phan i Perth le Nichuahlei Melbourne ah zarh 3 veve an caam hnuah Nitlaklei Melbourne ah an phan cang i Khrihfabu kip sinah caan an hman liopi a si.

May 21 ah Nitlaklei Melbourne ah an rak phan i June 10 tiang an um lai, cu hnuah June 11 in 17 tiang Brisbane, June 18 in 24 tiang Coffs Harbour le June 25 in July 8 tiang Adelaide ah an tlawng than lai.

Atu lio hi Nitlaklei Melbourne um Khrihfabu kip sinah thawngtha chimnak le lung siaherh bia an chimphuan liopi a si i an caam chung poah cu Chin khrihfabu kip sinah lenkainak an ngei lai.

Mizapi he tonbiaruahnak cu kan hnu zarh Zarhteni ahkhan tuah dingin timhlamh a rak si cang ko nain khuacaan ziak lo ruangah Mai Ca Bor cu a dam lo caah a tanglei ni le caan ah tuah dingin timtuah than a si.

Mizapi he tonbiaruahnak cu thaizing Zarhteni,  02 June ah zinglei sml 10: 30 in chun 01: 30 tiang tuah a si lai.

A hmun cu:  MCCV Hall/ New Church
17-19 Ormond Avenue
Sunshine VIC 3020

Atu tiang an umkalnak ah CNA Ralkap Mai Ca Bor i a lungum chimphuannak nih minung tampi thinlung cu a kekkuai i mitthli tiang an luanter.

Australia an caam chungah Mai Ca Bor cu Australia hmun then, Chin Cable Network (CCN) nih tonbiaruahnak an ngeih. Cu lioah, Mai Ca Bor nih biahalnak a lehmi bia cu “Ka khua cu Camp Victoria a si, ka holh zong CNA holh a si ko”, ti hi a si.

Hi bialehnak a chimmi cungah mitampi nih cun Mai Ca Bor cu an conglawmh i upatnak an langhter. Mi lungfim cheukhat nih ‘upat awktlak nusal tha’ hrimhrim a si tiin an thangthat. Cheukhat cu laklawh le lungawthawm ngai in an um ve.

A taang rihmi zarh chungah Rev. Tluang Hre le CNA Ralkap Mai Ca Bor cu Nitlaklei Melbourne um Chinmi hna sinah biachimnak le lenkainak an ngei lai.