‘Sual Man Dantatnak Na Tuar Lai’ Tiah Al Qaeda Nih Myanmar Ralrin Pek

Myanmar

Al Qaeda ralhrang pawl nih Rohingya muslim pawl cu tanhpinak le bawmhnak pek hna dingin sawmnak an tuah i Myanmar nihhin ‘sual man dantatnak a tuar lai’ tiah tiah ralrin peknak an tuah cang tiah theih a si.

A thar in Rohingya muslim ralzaam pawl cu Rohingya ralhrang/tapung phu nih Aug 25 ah Myanmar ralkap sakhaan le ralkap hmunhma ah tukdohnak an tuah hnu in Bangladesh ah an zaam hna i minung 400,000 deng an si cang.

Sep 11, 2001 lio US tuknak ah aa telmi ralhrang phu, Al Qaeda nih cun Myanmar ram chung um Rohingya muslum pawl cu ralkap thazaang in siseh, hriamnam in siseh bawmhnak pek hna ding an si tiah vawlei cung muslim vialte sinah sawmnak thanhca an chuah.

 “Saram bantukin kan unau a simi muslim pawl an tuahtonak hna hi dantatnak/lehrulhnak um loin liamter a si lai lo”.

“Myanmar cozah nihhin kan unau muslim pawl an tuar cang bantukin tuarter an si ve lai”, tiah Al Qaeda phu nih cun thanhca an chuah cang ti a si.

Myanmar cozah nih cun mipi le ralkap le palik cungah tukdohnak a tuahtu ralhrang tukdohnak le dawithawlnak kan tuah tiah an chim i khuapi chung pawl ah ralhrang nih bomb an puah kho men tiah ralrin peknak zong an tuah cang. Atu ah Al Qaeda nih thanhnak an tuah tikah lungrethei deuh ngai a si men lai.

 “Muslim kan unau hna bawmh awk ah a herhmi timhlamhnak ngeih ding le tukdohnak tuah dingin Myanmar lei kal dingin Bangladesh, India, Pakistan le Philippines i kan unau ralkap vialte kan sawm hna”, tiah Al Qaeda phu nih an chim fawn.

Ref: Reuters

error: Faiceu News COPY kan sianglo, SHARE lawng ngah!!