UN Update: Myanmar In Bangladesh Ah Rohingya 370,000 An Zaam Cang

Rohingya

August thla dih lai in atu tiangah Rakhine Ramkulh, Myanmar in Bangladesh ah dornak kawl in a zaammi Rohingya hi 370,000 hrawng an si cang tiah UN lei in chimrel khotu Vivian Tan nih nihin ah a chim.

Rohingya ralzaam pawl cu tihaal pawtaam le zawtnak phunphun an tuar hna, October 2016 khan Bangladesh ah dornak kawlmi Rohingya hi a tlawmbik 457,000 cu an si cang. Hi hlanpi zong ah Bangladesh ah a rak zaam cangmi tampi an um rih.

Ni khat hnu ni khat in a phan thar cu an um lengmang rih. Bangladesh nih an min cazin laaknak cu an thawk cang, atu hi ngakchia kum 4-14 karlak mincazin laaknak an tuah cang hna i cawnnak ah chiah an si lai.

World Food Programme (WFP), Red Cross le adangdang NGOs pawl hna nih facang, dinti le changreu ti bantuk bawmhnak zong an pek hna i an zuampiak hna ko nain minung an tam ruangah zohkhenh le conghramh hau tampi an um tikah bawmhnak an herh hringhran.

Lung zawtnak le zawtnak dang ngeimi hna, naupawi lio nu hna, nau ngeika nu hna le nulepa ngeilo ngakchia hna zong an tampi tikah bawmh herh tukmi lawngte an si hna.

Rakhine ramkulh chung buaibainak le Rohingya pawl vaakvaihnak kong ah UNHCR cu a lungre a thei taktak cang i vawlei cung ram hruaitu hna zong biatak in khua an ruat cang hna.

US zong nih Rakhine ramkulh buaibainak kong ah an lungretheihnak le an siaremlonak an langhter i daihnak ser a si nakhnga forhfialnak bia an phuan cang. Tukdohnak cungah mawhchiatnak cu an langh nain Myanmar ralkap asiloah Rohingya ralhrang ti in an chim lo.

Britain le Sweden ram nih Ramkhine Ramkulh chung tukdohnak kong le Rohingya pawl kong ah ceihhmainak ngei dingin an hal caah thaizing Cawn Nithumni hi UN Security Council ah Myanmar kong ceih a si lai tiah theih a si.

Ref: AFP/Reuters

error: Faiceu News COPY kan sianglo, SHARE lawng ngah!!