UNHCR: Chin Ralzaam Hna Cu UNHCR Huhphenhnak An Herh Ti Lo

Chin

Myanmar, Chin Ramkulh cu atu ah a him cang i a daih cang ko caah Chin ralzaam hna cu UNHCR huhphenhnak/kilvennak an herh ti lo tiah UNHCR lei nih an chim.

Kuala Lumpur i UNHCR lei chimrel khotu nih, kum zeimawzat Chin Ramkulh chung ramkhel. Zatlang nuncannak le humhimnak lei thanchonak zoh tikajh Chin Ramkulh chung hi cu caansau ca ding zumh awktlak dingin thanchonak lei a panh cang ko ti hi a fiang cang ko tiah a chim.

 “A liamcia kum 4 chungah Malaysia i Chin zatlangbu aiawhtu hna he caan hman tein Chin Ramkulh chung thil sining kong le thlennak siseh, UNHCR nih ralzaam dirhmun in kilvennak pek a herh ti lo tikah zei bantuk dah timhlamh a herh lai timi tiang ceihhmainak kan ngei lengmang cang”.

“A tlangpi in chim ahcun, ralzaam sinak le  vawlei cung pumpi kilvennak timi hi UNHCR nih a herh zat chung caan lawng pekmi a si”, tiah Nihin Cawn Ningani ahkhan UNHCR lei in chimrel khotu nih The Star sinah Email (cakuat) ah lehnak a chim.

 “Ralzaam sinak/dirhmun hi amah chuahkehnak ram asiloah ram pakhatkhat ah humhimnak le kilvennak pek le hmuhter a si cang ahcun pek a si ti lo”, tiah UNHCR lei in chimrel khotu nih cun a chim chih,

Atu lioah Chin ralzaam hna kong ah biathlehnak tuahmi hi Malaysia um ca lawng si loin India le Thailand um hna ca zong ah a si. UNHCR nih cun a herh ning le a si khawh chung paoh in Chin zatlang bu hna he pehzulh in tonbiaruahnak ngeih dingin chimrelnak an ngei than.

Cun, UNHCR nih Chin ralzaam hna caah caan sau a nguhmi bawmhchanhnak peknak dingah naihniam tein rian a tuan thiamthiam ko lai tiah UNHCR lei in chimrel khotu nih cun a chim fawn.

Anmah lungtho tein an chuahkehnak ram ah a kir duhmi hna bawmhnak siseh, ram thumnak lei kal kho dingmi hna bawmhchanhnak siseh, ram hnihnak ah chikkhat khuasaknak, riantuannak ti bantuk pawl zong kan bawmhchanh hna ko lai tiah UNHCR lei in an chim.

 “A liamcia kum 4 chung kha UNHCR nih Malaysian cozah he Chin ralzaam hna hi an ram chung riantuantu ah hman hna dingin tawlrelnak kan rak ngei cang”.

“Hi hi, atu ah ralzaam sinak in kilven an sinak a dih cang dingmi Chinmi hna bantuk caah hin a rem/tha ngaimi a si hnga. Hi bantuk thlennawnnak caan ahhin phungning tein an nuncan khawh le rian hna an tuan khawh ding le an i cawm khawh ding hi a tha ngai hnga”, tiah UNHCR lei chimrel khotu nih cun a chim.

Ref: The Star Online