Zinghmuh Tlang Hi Hakha Peng Ta A Si Maw?

Zinghmuh Tlang

Zinghmuh Tlang hi ahohmanh nih i cuh awk zong a si lo ti hi mi tampi nih fian a si ko. Tlang hi i cuh taktak mi thil cu a si lo, aa dawh ruang le a that ruangah khua khat le khua khat, peng khat le peng khat i cuh len awk zong a si lo.

May 21, 2018 ah Chuncung khuami 56 nih Zinghmuh Tlang ah ramri thennak le hngalhnak lung an phan, hi kong ah Falam khuami hna nih an lungtlinlonak cu biatak tein an langhter i an cawlcang.

Hi lungphun hi Hakha le Hakha peng nih phunmi a si lo, Chuncung khuabawi hruainak in Chuncung khuami, ramchung ramleng hnatlaknak in phunmi a si. Hi lungphun hi ram cuhnak asiloah mi ram chuh duhnak lungthin in phunmi zong a si lo.

Chuncung khuami hna nih mi ram chungah mi ram cuh in an phunmi zong a si lo. Chuncung khuami nih an ram chungah an phunmi a si ko caah Hakha peng huap in dohdalnak tuah ding zong a si lo. Hi kong ahhin ramri hmun ah a ummi Chuncung le Ramthlo nih an i ceih awk deuh a si.

Chuncung hi 1936 ah “Appointment Order of Chin Headman” a ngeimi le ramri (boundary) thennak Ca le Map zong a ngeimi an si. Nichuah, nitlak, chaklei le thlanglei tiang ramri fiang tein a ngeimi khua a si.

Chuncung nihhin Falam District, Hakha Sub-township chung khuate ramri thennak cauk zong an ngeih. Cun, November 2008 ah Ramthlo nih Chuncung ram cuhnak an tuah ruangah Ramkulh Cozah aiawh palai hna nih ZInghmuh Tlang cu an zoh hnuah Chuncung ram a si ko tiah biachahnak ca zong an rak chuah cang.

Chuncung hi Hakha peng, Thantlang peng le Falam peng aa thennak zawn hmun bak a si i Miraang (British) uktu pawl nih ramri an rak thennak zoh tikah Chuncung le Ramthlo karlak ‘Haive Va” tiva in a si. Haime Va cung ZInghmuh Tlang tanglei khi Ramthlo ram a si i tlang let lei poah cu Ramthlo khua cunglei tiang Chuncung ram a si.

Zinghmuh Tlang a let lei asiloah a cunglei poah ah Chuncung ram a si bantukin Ramthlo khuami hna nih innsaknak ah thingah an duh ahcun Chuncung khuabawi sinah ar ti bantukin an nawlpat hmasa hna ti hi theihmi a si.

Zeiruang ahdah Chuncung nih atu bantukin ramri hngalhnak lungphun an tuah tiah cun Ramthlo nih tupi mei an duah, anmah nawl in thing an ah lengmang, nga tili an ser, tlang cungah a ummi “Lai Tili” tiah auhmi tibual ah Chuncung lung phunmi zong an khuaipiak hna, Chuncung theihter loin lam an cawh i MRTV ah Zinghmuh Tlang cu Falam peng a si tiah an langhter.

Atu ah Chuncung khuami hna nih lung an phunnak hmun hi Chetpa Bo tiah an auhmi ZInghmuh Tlang let/cunglei ah a si. Hi lungphun hi hrawh than awk le hloh than awk cu a tha ti lai lo ti cu a fiang. Zeicahtiah Chuncung ram ah phunmi a si.

Hi lungphun kongah Falam lei nih Hakha ah Ramkulh cozah zong an ton hna hnuah nizaan 27 May 2018 ah Chuncung ah Ramkulh cozah lei in tonbiaceihnak tuah a si. Hi tonbiceihnak ah Chief Minister Pu Lian Luai, Hluttaw Lutlai Pu Zo Bawi, Thingram Zohkhenhnak Zung vuanci Pu Mang Hen Dal, Hakha peng bawi Pu Chan Piang le Ramkulh zung bawi cheukhat an i tel.

Hi tonbiceihnak ah CM Pu Lian Luai nih, “Zinghmuh Tlang ah National Park kan tuah lai i thil tha hnem taktak a si lai, Chin ramkulh thanchonak caah kan i zuammi a si. President sin zong ah chimphuan dih cangmi a si. Vice President Henry Van Thio zong nih a zoh cang. Sersiam dingin tangka zong sangsen a si cang”, tiah a chim.

“Cucaah, khuanu khuapa hna nih khua kan khanpi uh, Pawcawmnak caah hmanmi lopil hna zong cu kan in hrialpiak hna ko lai”, tiah a chim chih.

Cun, Pu Zo Bawi nih cun, “MRTV nih Zinghmuh Tlang cu Falam peng ah a ummi a si tiah a phuanmi kha dik lomi a si. December thla dih hlanah hi an thanhmi hi an leet thanter hna lai. Zinghmuh Tlang ah National Park kan tuah lai i Chuncung lei in Eka 7000 leng, Thantlang lei in Eka 5000, Falam lei in Eka 6000 kan hman lai”.

“Cucu Hakha peng, Falam peng tiah ramri chiah loin “Zinghmuh National Park” tiah kan auh lai i cozah nih kan kilven lai. Satil thlahnak ah Eka 5000 kan zuah uh nan ti ahcun kan in pek ko hna lai”, tiah a chim.

Chuncung khuami hna nih ramri kong ah fianhnak tuah dingin biahalnak an tuahmi cu lehnak pakhat hmanh an tuah hna lo. Ramri thennak asiloah peng thennak um loin National Park cu tuah dingin cozah nih timhtuahnak an ngeihmi bel cu langhter a si.

Chuncung le Ramthlo ramri then/cheunak zoh tikah Zinghmuh Tlang hi Chuncung ta, Ramthlo ta asiloah Hakha peng ta, Falam peng ta tiah chim ding hi a hnok ngai, Zeicahtiah, Zinghmuh Tlang tanglei cu Ramthlo ram a si i a tlang let lei poah cu Chuncung ram a si.

Sihmanhsehlaw, atu ah lung phun a sinak le National Park sersiamnak ding hmun le ram cu Chuncung ram, Hakha Peng chung a si ti hi al awk a tha lo.

References:

  1. Chuncung Tuanbia Cauk (2010),
  2. Appointment Order of Chin Headman (1936)
  3. Facebook Page (Rev. Tluang Ceu)
  4. Chuncung Family Network (CFN)
  5. Chin Ramkulh Cozah Cathanh (2008)